करमाळा तालुक्यातील जिल्हा परिषद व पंचायत समिती निवडणुकीसाठी उमेदवारी; ३४२ अर्जांची विक्री

‌ करमाळा प्रतिनिधी करमाळा तालुक्यातील जिल्हा परिषद व पंचायत समिती निवडणुकीसाठी उमेदवारी अर्ज दाखल करण्यासाठी इच्छुक उमेदवार व कार्यकर्त्यांनी पंचायत समिती कार्यालयात मोठी गर्दी केली आहे. निवडणूक प्रक्रियेला सुरुवात होताच उमेदवारी अर्ज घेण्यासाठी उत्स्फूर्त प्रतिसाद मिळत असून आतापर्यंत सुमारे ३४२ उमेदवारी अर्जांची विक्री झाल्याची माहिती निवडणूक निर्णय अधिकारी अनिल कारंडे यांनी दिली.
तालुक्यातील विविध राजकीय पक्षांसह अपक्ष उमेदवारांनीही निवडणुकीच्या रिंगणात उतरण्याची तयारी सुरू केली आहे. त्यामुळे राजकीय हालचालींना वेग आला असून इच्छुक उमेदवारांकडून जोरदार मोर्चेबांधणी सुरू असल्याचे चित्र दिसून येत आहे. पंचायत समिती कार्यालयात दिवसभर उमेदवारी अर्ज घेणे व दाखल करण्यासाठी गर्दी होत असून ही प्रक्रिया शांततेत सुरू आहे.
निवडणूक प्रशासनाकडून उमेदवारांसाठी आवश्यक त्या सर्व सुविधा उपलब्ध करून देण्यात आल्या असून कोणताही गोंधळ होऊ नये यासाठी दक्षता घेतली जात आहे. पुढील काही दिवसांत उमेदवारी अर्ज दाखल करण्याच्या प्रक्रियेला आणखी गती येण्याची शक्यता असून त्यानंतर राजकीय समीकरणे अधिक स्पष्ट होणार आहेत.
करमाळा तालुक्यात जिल्हा परिषदेचे सहा गट व पंचायत समितीचे १२ गण आहेत. या निवडणुकीसाठी तालुक्यात एकूण २ लाख ८ हजार २३ मतदार असून त्यामध्ये १ लाख ९ हजार २१३ पुरुष, ९८ हजार ८०९ महिला व एक इतर मतदाराचा समावेश आहे. मोठ्या मतदारसंख्येमुळे आणि वाढलेल्या उमेदवारांच्या संख्येमुळे यंदाची निवडणूक चुरशीची ठरण्याची शक्यता व्यक्त केली जात आहे.