केतुर गणात ॲड अजित विघ्ने यांचा विजय सामाजिक न्याय राज्यमंत्री स्वर्गीय दिगंबरराव बागल मामांच्या आठवणींना उजाळा देत हलगीच्या तालावर जल्लोष

.            करमाळा प्रतिनिधी:
करमाळा तालुक्यातील केतुर पंचायत समिती गणातून एडवोकेट अजित विघ्ने यांनी दणदणीत विजय मिळवला आहे. विजयाची घोषणा होताच स्वर्गीय दिगंबरराव बागल मामा यांच्या बंगल्यावर जाऊन कार्यकर्त्यांसह हलगी वाजवून पारंपरिक पद्धतीने जल्लोष साजरा करण्यात आला. या आनंदोत्सवामुळे परिसरात उत्साहाचे आणि नवचैतन्याचे वातावरण निर्माण झाले.
एडवोकेट अजित विघ्णे हे सर्वसामान्य कुटुंबातून पुढे आलेले, चळवळीतील कार्यकर्ते म्हणून ओळखले जातात. स्वर्गीय दिगंबरराव बागल मामा यांच्या काळात त्यांनी विलासराव घुमरे यांच्या मार्गदर्शनाखाली निष्ठेने कार्यकर्ते म्हणून काम केले. त्याचबरोबर माजी आमदार जयवंतराव जगताप यांचेही ते कार्यकर्ते राहिले असून राजकीय अनुभवाची मजबूत शिदोरी त्यांच्या पाठीशी आहे.
करमाळा तालुक्यात यावेळी भाजप नेत्या रश्मी बागल आणि माजी आमदार संजय मामा शिंदे यांच्या नेतृत्वाखाली भाजप–राष्ट्रवादी काँग्रेसची महायुती करण्यात आली होती. या युतीला माजी आमदार जयवंतराव जगताप यांची खंबीर साथ लाभली. संजय मामा शिंदे गटाचे उमेदवार म्हणून राष्ट्रवादी काँग्रेसच्या वतीने एडवोकेट अजित विघ्णे यांनी महायुतीतून निवडणूक लढवली आणि सुमारे अडीच हजार मताधिक्याने विजय संपादन केला.
संघर्षातून उभे राहिलेले नेतृत्व म्हणून एडवोकेट अजित विघ्णे यांची करमाळा तालुक्यात ओळख आहे. सर्वसामान्य जनतेच्या प्रश्नांसाठी सातत्याने झटणारा कार्यकर्ता अशी त्यांची प्रतिमा आहे. माजी आमदार संजय मामा शिंदे यांनी राष्ट्रवादी काँग्रेसच्या माध्यमातून त्यांना संधी देत पंचायत समितीच्या रिंगणात उतरवले आणि ताकद दिली, असे मत राजकीय वर्तुळातून व्यक्त होत आहे.
आपल्या विजयाबद्दल प्रतिक्रिया देताना एडवोकेट अजित विघ्णे म्हणाले की, “या यशामध्ये माजी आमदार संजय मामा शिंदे, माजी आमदार जयवंतराव जगताप, रश्मी दीदी बागल तसेच युवा नेते दिग्विजय बागल ,सौ. सवितादेवी राजेभोसले, श्री. सुभाष आबा गुळवे यांचे मोलाचे सहकार्य लाभले. कार्यकर्त्यांनी दाखवलेल्या विश्वासामुळेच हा विजय शक्य झाला.”
स्वर्गीय दिगंबरराव बागल मामा हे विजयाच्या आनंदात हलगी वाजवून उत्सव साजरा करण्यासाठी प्रसिद्ध होते. त्याच परंपरेला उजाळा देत, मामांचे जुने कार्यकर्ते या नात्याने एडवोकेट अजित विघ्णे यांनी हलगीच्या तालावर आनंदोत्सव साजरा केला. या जल्लोषामुळे कार्यकर्त्यांमध्ये नवचैतन्य संचारले असून आगामी काळात पंचायत समितीतून विकासकामांना गती मिळेल, अशी अपेक्षा व्यक्त होत आहे.