विलासराव घुमरे सर यांच्या मार्गदर्शनाखाली करमाळ्यात भाजप–राष्ट्रवादीला ऐतिहासिक यश

करमाळा प्रतिनिधी 
करमाळा तालुक्यात झालेल्या जिल्हा परिषद व पंचायत समिती निवडणुकीत भाजप–राष्ट्रवादी काँग्रेस आघाडीने घवघवीत यश मिळवत तालुक्याच्या राजकारणात आपले वर्चस्व पुन्हा एकदा सिद्ध केले आहे. या यशामागे माजी आमदार विलासराव घुमरे यांचे अचूक मार्गदर्शन, नियोजनबद्ध रणनीती आणि कार्यकर्त्यांमध्ये साधलेला समन्वय निर्णायक ठरल्याची चर्चा राजकीय वर्तुळात होत आहे.
भाजप महिला प्रदेश उपाध्यक्ष रश्मी दीदी बागल, माजी आमदार संजय मामा शिंदे यांच्या नेतृत्वाखाली तसेच माजी आमदार जयवंतराव जगताप यांच्या खंबीर साथीमुळे आघाडीला हे यश मिळाले असले, तरी संपूर्ण निवडणूक यंत्रणेचे सूत्रधार म्हणून विलासराव घुमरे यांची भूमिका महत्त्वाची ठरली. प्रचाराचे नियोजन, उमेदवार निवड, बूथनिहाय बांधणी आणि कार्यकर्त्यांचे मनोबल उंचावणे या सर्व बाबींमध्ये घुमरे यांनी प्रभावी कामगिरी बजावली.
विरोधकांवर टीका करण्यापेक्षा विकासकामांचा मुद्दा केंद्रस्थानी ठेवत सकारात्मक प्रचारावर भर देण्यात आला. नव्या कार्यकर्त्यांना संधी देत अनुभवी कार्यकर्त्यांचा योग्य वापर करण्याचे धोरण राबवण्यात आले. परिणामी, मतदारांमध्ये विश्वास निर्माण झाला आणि त्याचे प्रतिबिंब निकालात स्पष्टपणे दिसून आले.
राजकारणात सुसंस्कृती जपत सर्व घटकांना सोबत घेऊन चालण्याची भूमिका घुमरे यांनी कायम जपली आहे. आपल्या सहकाऱ्यांना पुढे आणणे, त्यांचे नेतृत्व घडवणे आणि संघटन मजबूत करणे हीच त्यांची ओळख असून, याच भूमिकेमुळे ते करमाळा तालुक्याचे किंगमेकर म्हणून ओळखले जातात.
या निकालामुळे आगामी राजकीय समीकरणांमध्ये भाजप–राष्ट्रवादी आघाडी अधिक मजबूत झाली असून, करमाळा तालुक्यात आघाडीचा झेंडा फडकत राहील, असा विश्वास कार्यकर्त्यांकडून व्यक्त करण्यात येत आहे.