श्रीमान भाऊसाहेब झाडबुके इंग्लिश मिडीयम प्रायमरी स्कूलमध्ये ‘आनंद बाजार’ उत्साहात साजरा

करमाळा  प्रतिनिधी
करमाळा येथील श्रीमान भाऊसाहेब झाडबुके इंग्लिश मिडीयम प्रायमरी स्कूलमध्ये ‘आनंद बाजार’ हा उपक्रम उत्साहपूर्ण वातावरणात पार पडला. विद्यार्थ्यांच्या व्यवहारज्ञानास चालना देणाऱ्या या उपक्रमास पालक व मान्यवरांचा उत्स्फूर्त प्रतिसाद लाभला.
संस्थेच्या संचालिका मा. सौ. वर्षाताई ठोंबरे मॅडम यांच्या मार्गदर्शनाखाली कार्यक्रमाचे आयोजन करण्यात आले होते. कार्यक्रमाचे उद्घाटन पंचायत समिती करमाळा येथील विषय साधन व्यक्ती मा. श्री आदलिंगे सर, झाडबुके महाविद्यालयाचे प्राचार्य मा. श्री ढवळे सर तसेच जेष्ठ पालकवर्ग यांच्या हस्ते करण्यात आले. प्रारंभी उपस्थितांचे गुलाबपुष्प देऊन स्वागत करण्यात आले.
‘शिकता-शिकता कमवा’ या संकल्पनेवर आधारित या उपक्रमात विद्यार्थ्यांनी स्वयंस्फूर्तीने सहभाग घेत विविध प्रकारची फळे, पालेभाज्या, मिठाई, घरगुती खाद्यपदार्थ तसेच इतर वस्तू विक्रीसाठी आणल्या होत्या. विद्यार्थ्यांनी आकर्षक पद्धतीने स्टॉल उभारून वस्तूंची मांडणी केली होती. पालकांनी विद्यार्थ्यांकडून वस्तू खरेदी करून त्यांना प्रोत्साहन दिले.
या उपक्रमाद्वारे विद्यार्थ्यांना चलनांची ओळख, पैशांचा व्यवहार, नफा-तोटा यांसारख्या संकल्पना प्रत्यक्ष अनुभवातून समजावून देण्यात आल्या. तसेच पालेभाज्यांचे पोषणमूल्य आणि आरोग्यदायी आहाराचे महत्त्व यांची जाणीव करून देण्यात आली.
बार्शी शाखेतील टेक्नीकूल हायस्कूलचे शिक्षक मा. श्री अमोल बारकुल सर यांचे विशेष मार्गदर्शन लाभले. कार्यक्रमाच्या यशस्वीतेसाठी मुख्याध्यापिका मा. सौ. सोनाली पवार मॅडम, मेघा कांबळे मॅडम, चव्हाण मॅडम, आहेर मॅडम, ठोसर मॅडम तसेच सर्व शिक्षक व शिक्षकेतर कर्मचारी यांनी परिश्रम घेतले.
विद्यार्थ्यांच्या चेहऱ्यावरचा आनंद आणि पालकांचा उत्साह यामुळे ‘आनंद बाजार’ हा उपक्रम संस्मरणीय ठरला आहे.