कै ‌बाबुराव गायकवाड प्रतिष्ठानच्यावतीने पंढरीला जाणाऱ्या वारकरी सेवेचे सर्वत्र कौतुक चहा-बिस्कीट वाटप उपक्रमाला उत्स्फूर्त प्रतिसाद

करमाळा प्रतिनिधी
आषाढी एकादशीच्या निमित्ताने पंढरपूरच्या दिशेने मार्गस्थ झालेल्या वारकऱ्यांच्या सेवेसाठी कै. बाबुराव (तात्या) गायकवाड प्रतिष्ठानच्या वतीने करमाळा शहरात आयोजित करण्यात आलेल्या मोफत चहा-बिस्कीट वाटप उपक्रमाला वारकरी आणि भाविकांचा उत्स्फूर्त प्रतिसाद लाभला. “वारकऱ्यांची सेवा हीच विठ्ठलाची सेवा” या भावनेतून राबविण्यात आलेल्या या उपक्रमामुळे करमाळा शहरातील सेवाभाव आणि सामाजिक बांधिलकीचे दर्शन घडले.
प्रतिष्ठानचे संस्थापक अध्यक्ष सचिन गायकवाड यांच्या मार्गदर्शनाखाली हा उपक्रम दि. १७ ते १९ जुलै २०२६ या कालावधीत छत्रपती शिवाजी महाराज चौक, करमाळा येथे राबविण्यात आला. सकाळी ८ ते ११ आणि सायंकाळी ६ ते ९ या वेळेत पंढरपूरकडे जाणाऱ्या हजारो वारकरी व भाविकांना गरम चहा आणि बिस्कीटांचे मोफत वाटप करण्यात आले.
सलग पायी प्रवासामुळे थकलेल्या वारकऱ्यांनी या सेवा केंद्राचा मोठ्या प्रमाणावर लाभ घेतला. सेवा केंद्रावर दिवसभर वारकऱ्यांची वर्दळ कायम होती. प्रतिष्ठानच्या कार्यकर्त्यांनी आत्मीयतेने आणि शिस्तबद्ध पद्धतीने प्रत्येक वारकऱ्याचे स्वागत करून सेवा दिली. या सेवेमुळे वारकऱ्यांनी समाधान व्यक्त करत प्रतिष्ठानच्या कार्याचे भरभरून कौतुक केले.
आषाढी वारी ही महाराष्ट्राच्या संत परंपरेचे प्रतीक असून, वारकऱ्यांच्या सेवेसाठी समाजातील विविध संस्था पुढाकार घेत असतात. त्याच परंपरेला साजेसा हा उपक्रम करमाळ्यात राबविण्यात आला. महिला, ज्येष्ठ नागरिक आणि लहान मुलांसह सर्व भाविकांनी या उपक्रमाचा लाभ घेतला.
वारकरी आणि नागरिकांकडून मिळालेला उत्स्फूर्त प्रतिसाद हा या उपक्रमाच्या यशाची पावती ठरला. सेवाभाव, सामाजिक उत्तरदायित्व आणि भक्तीचा सुंदर संगम घडविणारा हा उपक्रम करमाळा शहरात विशेष चर्चेचा विषय ठरला असून, भविष्यातही अशा सेवाभावी उपक्रमांचे सातत्य कायम राहावे, अशी भावना उपस्थितांनी व्यक्त केली असुन सर्वत्र कौतुक होत आहे.