रिमझिम सरींमध्ये रावगावात निवृत्तिनाथ महाराज पालखीचे भक्तिमय स्वागत! ‘ज्ञानोबा-तुकाराम’च्या अखंड जयघोषाने दुमदुमला परिसर; वारकऱ्यांच्या सेवेसाठी ग्रामस्थ व प्रशासनाचा आदर्श पुढाकार

रावगाव (ता. करमाळा) | प्रतिनिधी
आषाढी वारीच्या पवित्र परंपरेत नाशिक जिल्ह्यातील श्रीक्षेत्र त्र्यंबकेश्वर येथून पंढरपूरच्या दिशेने प्रस्थान केलेल्या संतश्रेष्ठ निवृत्तिनाथ महाराज पालखी सोहळ्याचे शनिवारी करमाळा तालुक्यातील रावगाव येथे रिमझिम पावसाच्या सरींमध्ये जल्लोषात आणि भक्तिमय वातावरणात स्वागत करण्यात आले. “ज्ञानोबा-तुकाराम”, “विठ्ठल-विठ्ठल”, “पांडुरंग हरी” या अखंड हरिनामाच्या जयघोषाने संपूर्ण परिसर दुमदुमून गेला. पावसाची पर्वा न करता हजारो वारकरी टाळ-मृदंगाच्या निनादात, अभंग-भजनांच्या सुरावटीत आणि भगव्या पताकांच्या साक्षीने पंढरीच्या दिशेने मार्गक्रमण करत असल्याचे प्रेरणादायी दृश्य पाहायला मिळाले.
अहिल्यानगर जिल्ह्यातील कर्जत तालुक्यातील मुक्काम पूर्ण करून पालखीने सोलापूर जिल्ह्यात प्रवेश केला. रावगाव येथे पालखीचे आगमन होताच ग्रामस्थ, भाविक आणि वारकऱ्यांनी फुलांची उधळण, टाळ-मृदंगाचा गजर आणि विठ्ठलनामाच्या जयघोषात पालखीचे भावपूर्ण स्वागत केले. संपूर्ण गाव भगव्या पताकांनी सजले होते. प्रत्येकाच्या ओठांवर हरिनाम आणि चेहऱ्यावर भक्तीचा आनंद झळकत होता.
यावेळी उपमुख्य कार्यकारी अधिकारी, प्रांताधिकारी मनीषा आहाड, उपविभागीय पोलीस अधिकारी अंजना कृष्णा, तहसीलदार शिल्पा ठोकडे, पोलीस निरीक्षक रणजित माने तसेच रावगावच्या सरपंच रोहिणी शेळके यांनी पालखीचे स्वागत केले. पालखी सोहळा सुरळीत, सुरक्षित आणि शिस्तबद्ध पार पडावा यासाठी प्रशासनाने व्यापक नियोजन केले होते.
पालखीसोबत चालणाऱ्या हजारो वारकऱ्यांमध्ये युवक, महिला, ज्येष्ठ नागरिक आणि बालवारकऱ्यांचा उत्साह विशेष लक्षवेधी ठरला. हातात भगवे झेंडे, गळ्यात तुळशीमाळ आणि मुखी विठ्ठलनाम घेत वारकरी पावसाची तमा न बाळगता पुढे जात होते. रेनकोट, प्लास्टिकचे संरक्षक कव्हर आणि टोपीचा वापर करूनही त्यांच्या भक्तिभावात कोणतीही कमी जाणवत नव्हती.
रावगाव येथे ग्रामस्थ, विविध सामाजिक संस्था आणि स्वयंसेवकांनी वारकऱ्यांच्या सेवेसाठी मोठ्या उत्साहाने पुढाकार घेतला. पिण्याचे शुद्ध पाणी, वैद्यकीय मदत, आरोग्य तपासणी, विश्रांतीची व्यवस्था, अन्नदान, चहा-नाश्ता, मोफत केस कर्तन, कपड्यांना इस्त्री तसेच चप्पल दुरुस्ती अशा विविध सेवा उपलब्ध करून देण्यात आल्या. वारकऱ्यांनी या सेवाभावी उपक्रमांचे मनापासून कौतुक केले.
पालखी मार्गावरील वाहतूक नियंत्रण, सुरक्षा, स्वच्छता, आरोग्य सेवा, आपत्कालीन मदत आणि पिण्याच्या पाण्याची व्यवस्था प्रशासनाने काटेकोरपणे केली होती. विविध विभागांचे अधिकारी आणि कर्मचारी संपूर्ण मार्गावर तैनात राहून वारकऱ्यांना कोणतीही अडचण निर्माण होऊ नये यासाठी दक्ष होते.
रिमझिम पावसाच्या साक्षीने, अखंड हरिनामाच्या गजरात आणि भक्तिभावाच्या वातावरणात पार पडलेला संतश्रेष्ठ निवृत्तिनाथ महाराज पालखी सोहळा रावगावकरांसाठी अविस्मरणीय ठरला. वारकऱ्यांची शिस्त, ग्रामस्थांचा सेवाभाव आणि प्रशासनाचे सुयोग्य नियोजन यामुळे रावगावने वारकरी परंपरेचा आदर्श जपत भक्ती, सेवा आणि संस्कृतीचा सुंदर संगम अनुभवला आहे.