कमलादेवी मंदिर जीर्णोद्धारासाठी सौरभ देशपांडे यांची ५ हजार १ रुपयांची देणगी

करमाळा प्रतिनिधी : करमाळा शहराचे ग्रामदैवत व भाविकांचे श्रद्धास्थान असलेल्या श्री कमलादेवी मंदिराच्या जतन व संवर्धनासाठी करमाळा येथील रहिवासी व सध्या पुणे येथे वास्तव्यास असलेले श्री. सौरभ सुनील देशपांडे यांनी १६ ऑगस्ट २०२६ रोजी ५ हजार १ रुपयांची ऑनलाइन देणगी श्री कमलादेवी चरणी अर्पण केली. मंदिराच्या जतन व संवर्धनाच्या सुरू असलेल्या कार्याला हातभार लावण्यासाठी त्यांनी ही देणगी दिली.
या देणगीबद्दल श्री कमला देवी मंदिर समितीच्या वतीने व्यवस्थापक अशोक गाठे यांनी सौरभ देशपांडे यांचा सत्कार करून आभार व्यक्त केले. यावेळी मंदिराचे मानकरी, सेवेकरी तसेच भाविक भक्त उपस्थित होते.
श्री कमलादेवी मंदिराला प्राचीन व ऐतिहासिक वारसा लाभला असून मंदिराच्या मूळ पुरातन दगडी वास्तूचे जतन व संवर्धन करण्याचे काम सध्या प्रगतीपथावर आहे. श्री जगदंबा कमलादेवी देवस्थान ट्रस्ट, करमाळा यांच्या पुढाकारातून गेल्या वर्षापासून मंदिर जतन व संवर्धनाच्या कामाला सुरुवात करण्यात आली आहे. भाविकांच्या देणगीरूपी सहकार्यातून या महत्त्वपूर्ण कार्याला मोठी चालना मिळत आहे.
मंदिराच्या जतन व संवर्धनाचे काम पूर्ण झाल्यानंतर भाविकांना श्री कमलादेवी मंदिराच्या मूळ पुरातन दगडी स्वरूपाचे दर्शन अधिक चांगल्या पद्धतीने घेता येणार आहे. त्यामुळे या ऐतिहासिक व धार्मिक वास्तूचे संवर्धन होऊन पुढील पिढ्यांसाठी हा वारसा जतन होणार आहे.
या पवित्र कार्यासाठी भाविक, नागरिक, माजी विद्यार्थी, उद्योजक तसेच श्री कमलादेवी भक्तांनी सढळ हाताने देणगी देऊन मंदिर जतन व संवर्धनाच्या कार्यात सहभागी व्हावे, असे आवाहन श्री जगदंबा कमलादेवी देवस्थान ट्रस्टच्या वतीने करण्यात आले आहे. मंदिराच्या जतन व संवर्धनासाठी ऑनलाइन देणगीची सुविधाही उपलब्ध करून देण्यात आली आहे.
देणगीसाठी संपर्क :
अशोक गाठे, व्यवस्थापक
मो. ९४०४७०८९२४ / ९५७९९६१७७४