कर्मवीर आण्णासाहेब जगताप विद्यालयाचे मुख्याध्यापक सुनील जाधव यांना ‘ज्ञानज्योती आदर्श पुरस्कार’ प्रदान

करमाळा : प्रतिनिधी : कर्मवीर आण्णासाहेब जगताप विद्यालयाचे कर्तव्यनिष्ठ मुख्याध्यापक श्री. सुनील जनार्दन जाधव यांना शैक्षणिक क्षेत्रातील उल्लेखनीय कार्याबद्दल ‘ज्ञानज्योती आदर्श मुख्याध्यापक पुरस्कार’ प्रदान करण्यात आला. पंढरपूर येथील स्वेरी कॉलेज ऑफ इंजिनिअरिंगचे प्राचार्य प्रा. डॉ. बबनवाहन पांडुरंग रोंगे यांच्या पुढाकाराने आयोजित करण्यात आलेल्या ‘ज्ञानज्योती आदर्श पुरस्कार वितरण सोहळ्यात’ त्यांचा गौरव करण्यात आला.
रविवार, दि. १३ सप्टेंबर रोजी तुळजाई लॉन्स, बार्शी नाका, करमाळा रोड, कुर्डुवाडी येथे हा पुरस्कार वितरण सोहळा उत्साहात पार पडला. शिक्षण क्षेत्रात प्राचार्य, मुख्याध्यापक, शिक्षक, क्रीडा शिक्षक, कला शिक्षक तसेच शिक्षकेतर कर्मचाऱ्यांनी केलेल्या उल्लेखनीय कार्याचा गौरव करण्यासाठी या पुरस्कार सोहळ्याचे आयोजन करण्यात आले होते.
मुख्याध्यापक सुनील जाधव यांनी शैक्षणिक गुणवत्ता वाढविण्यासोबतच विद्यार्थ्यांच्या सर्वांगीण विकासासाठी सातत्याने प्रयत्न केले आहेत. त्यांच्या समर्पित कार्यशैलीमुळे विद्यार्थ्यांमध्ये ज्ञान, संस्कार आणि मूल्यांची जोपासना होत असून विद्यालयाच्या शैक्षणिक प्रगतीत त्यांचे योगदान महत्त्वपूर्ण ठरले आहे. त्यांच्या या कार्याची दखल घेत त्यांची आदर्श मुख्याध्यापक पुरस्कारासाठी निवड करण्यात आली.
पुरस्कार स्वीकारल्यानंतर सुनील जाधव यांचे शिक्षक, शिक्षकेतर कर्मचारी, विद्यार्थी, पालक तसेच शिक्षण क्षेत्रातील मान्यवरांनी अभिनंदन केले. शैक्षणिक क्षेत्रातील त्यांच्या कार्याला मिळालेला हा सन्मान करमाळा तालुक्यासाठी अभिमानाची बाब आहे.