खोलेश्वर महादेवाला पावसासाठी साकडे नगराध्यक्ष मोहिनी सावंत व नगरसेवक संजय सावंत दाम्पत्याच्या हस्ते पूजा-अभिषेक तीन दिवसांचा धार्मिक उपक्रम

करमाळा : प्रतिनिधी – करमाळा शहर व परिसरात समाधानकारक पाऊस पडावा, शेतकरी बांधवांना दिलासा मिळावा, जलसाठे भरावेत आणि सर्वत्र सुख-समृद्धी नांदावी, या भावनेतून खोलेश्वर आरती मंडळ व श्री स्वामी समर्थ भक्त परिवाराच्या वतीने धार्मिक उपक्रमाचे आयोजन करण्यात आले आहे. करमाळ्यातील श्री खोलेश्वर महादेव मंदिरात महादेवाला पाण्यात कोंडून पर्जन्यवृष्टीसाठी साकडे घालण्यात आले असून, हा धार्मिक उपक्रम सलग तीन दिवस चालणार आहे. हजारो महिला भाविकांच्या सहभागामुळे मंदिर परिसर भक्तिमय वातावरणाने भारावून गेला आहे.
या उपक्रमाची सुरुवात नगराध्यक्ष सौ. मोहिनी सावंत व नगरसेवक संजय सावंत या दाम्पत्याच्या हस्ते श्री खोलेश्वर महादेवाची विधिवत पूजा व अभिषेक करून करण्यात आली. यावेळी भाविकांनी मोठ्या श्रद्धेने महादेवाचे दर्शन घेतले. त्यानंतर हजारो महिला भाविकांनी एकत्र येत महादेवाचे नामस्मरण केले आणि पर्जन्यवृष्टीसाठी सामूहिक प्रार्थना केली. वरुणराजाने कृपादृष्टी करावी, वेळेवर आणि समाधानकारक पाऊस पडावा, शेतीला पाण्याचा आधार मिळावा तसेच दुष्काळाचे संकट दूर व्हावे, अशी भावना यावेळी व्यक्त करण्यात आली.
करमाळा तालुक्यातील शेती मोठ्या प्रमाणावर पावसावर अवलंबून आहे. त्यामुळे पावसाचे वेळेवर आगमन होणे हे शेतकरी आणि ग्रामीण अर्थव्यवस्थेसाठी अत्यंत महत्त्वाचे मानले जाते. पावसाअभावी निर्माण होणाऱ्या परिस्थितीच्या पार्श्वभूमीवर जलसाठे भरावेत, विहिरींच्या पाणीपातळीत वाढ व्हावी आणि शेतीला नवसंजीवनी मिळावी, या उद्देशाने भाविकांनी श्रद्धेने महादेवाच्या चरणी साकडे घातले.
महादेवाला पाण्यात कोंडून पावसासाठी साकडे घालण्याचा हा धार्मिक उपक्रम तीन दिवस चालणार असून, या कालावधीत पूजाअर्चा, अभिषेक, नामस्मरण आणि सामूहिक प्रार्थना करण्यात येणार आहे. खोलेश्वर आरती मंडळ आणि श्री स्वामी समर्थ भक्त परिवाराच्या वतीने आयोजित या उपक्रमाला महिला भाविकांचा मोठा प्रतिसाद मिळत आहे. सकाळपासूनच मंदिर परिसरात भाविकांची वर्दळ दिसून येत असून, महादेवाच्या जयघोषाने परिसर दुमदुमून जात आहे.
श्री खोलेश्वर महादेव हे जागृत देवस्थान असल्याची भाविकांची श्रद्धा आहे. अनेक वर्षांपासून या देवस्थानाशी परिसरातील नागरिकांची धार्मिक आस्था जोडलेली आहे. महादेवाच्या कृपेची अनुभूती अनेक भाविकांना आल्याचे सांगितले जाते. त्यामुळे खोलेश्वर महादेवाला पाण्यात कोंडून पावसासाठी साकडे घातल्यानंतर यंदाही पाऊस पडेल, असा विश्वास भाविकांमध्ये व्यक्त होत आहे.
याबाबत शेखर जोगळेकर यांनी सांगितले की, मागील काही वर्षांपासून पर्जन्यवृष्टीसाठी खोलेश्वर महादेवाला साकडे घालण्याचा धार्मिक उपक्रम आयोजित केला जात आहे. या उपक्रमानंतर पावसाचे आगमन झाल्याची अनुभूती भाविकांनी घेतली आहे. यंदाही महादेवाच्या चरणी सामूहिक प्रार्थना करण्यात आली असून, परिसरात समाधानकारक पाऊस पडावा, हीच सर्व भाविकांची भावना आहे.
या धार्मिक कार्यक्रमाच्या निमित्ताने पत्रकार सिद्धार्थ वाघमारे व अखिल भारतीय डिजिटल मीडिया पत्रकार संघाचे अध्यक्ष दिनेश मडके यांचा खोलेश्वर आरती मंडळाच्या वतीने श्रीफळ देऊन सत्कार करण्यात आला. यावेळी मंडळाचे पदाधिकारी, कार्यकर्ते तसेच महिला भाविक मोठ्या संख्येने उपस्थित होते.
कार्यक्रमाचे सूत्रसंचालन शेखर जोगळेकर यांनी केले. यावेळी पत्रकार सिद्धार्थ वाघमारे, अखिल भारतीय डिजिटल मीडिया पत्रकार संघाचे अध्यक्ष दिनेश मडके, खोलेश्वर मंदिराचे पुजारी करण काळे, दिग्विजय घोलप, गणेश खराडे, अनिल वायकर नागेश कसाब बबन भुतकर सतिश भिसे यांच्यासह अनेक मान्यवर उपस्थित होते. स्वामी समर्थ भक्त परिवारातील हजारो महिला भाविकांनी सामूहिक प्रार्थनेत सहभागी होत महादेवाचा जयघोष केला.
महादेवाला पाण्यात कोंडण्यात आल्याने मंदिर परिसरात धार्मिक वातावरण निर्माण झाले आहे. श्रद्धा, भक्ती आणि सामूहिक प्रार्थनेच्या माध्यमातून सुरू असलेल्या या उपक्रमामुळे भाविकांमध्ये उत्साहाचे वातावरण आहे. पावसासाठी महादेवाच्या चरणी घातलेले हे साकडे शेतकरी आणि सर्वसामान्य नागरिकांच्या आशा-अपेक्षांना धार्मिक भावनेची जोड देणारे ठरत आहे.
कार्यक्रम यशस्वी करण्यासाठी खोलेश्वर देवस्थान पुजारी नागेश काळे करन काळे गुरव, समस्त काळे परिवार, संघर्षे दयाळ चेतन्य डोळस अर्यव माने अर्थळ जोगळेकर खोलेश्वर आरती मंडळ आणि श्री स्वामी समर्थ भक्त परिवारातील कार्यकर्ते परिश्रम घेत आहेत. तीन दिवस चालणाऱ्या या धार्मिक उपक्रमात मोठ्या संख्येने भाविक सहभागी होत असून, खोलेश्वर महादेवाच्या जयघोषाने मंदिर परिसर भक्तिमय झाला आहे.