Categories: Uncategorized

सहकाराच्या बळावर करमाळ्यात बँकिंग सेवांचा विस्तार; जनता सहकारी बँकेची ४२ वी शाखा सुरू! नानासाहेब जाधव यांच्या हस्ते शाखेचे उद्घाटन; व्यापारी, उद्योजक, शेतकरी आणि सर्वसामान्य खातेदारांना मिळणार आधुनिक बँकिंग सुविधांचा लाभ

करमाळा  प्रतिनिधी
सहकार, विश्वास आणि ग्राहकाभिमुख सेवेच्या बळावर आर्थिक प्रगतीचा नवा अध्याय सुरू करण्याच्या दिशेने सोलापूर जनता सहकारी बँकेने करमाळा शहरात आपल्या सेवेचा विस्तार केला आहे. बँकेच्या ४२ व्या शाखेचा उद्घाटन सोहळा गुरुवारी (दि. १९ नोव्हेंबर) सायंकाळी उत्साहपूर्ण वातावरणात पार पडला. पश्चिम महाराष्ट्र प्रांताचे प्रांत संचालक नानासाहेब जाधव आणि करमाळा नगराध्यक्षा मोहिनी सावंत यांच्या हस्ते या नवीन शाखेचे उद्घाटन करण्यात आले. या शाखेमुळे करमाळा शहरासह परिसरातील व्यापारी, उद्योजक, शेतकरी आणि सर्वसामान्य नागरिकांना आधुनिक बँकिंग सुविधांचे दालन खुले झाले आहे.
गेल्या सहा दशकांपासून सहकार क्षेत्रात विश्वासार्हता आणि सेवाभावी वृत्तीच्या माध्यमातून कार्यरत असलेल्या सोलापूर जनता सहकारी बँकेने ग्राहकांच्या विश्वासाच्या बळावर आपली स्वतंत्र ओळख निर्माण केली आहे. बदलत्या आर्थिक परिस्थितीत ग्राहकांच्या गरजा लक्षात घेऊन बँकेने शाखा विस्तारावर भर दिला आहे. त्याचाच एक भाग म्हणून करमाळा शहरात ४२ व्या शाखेचा प्रारंभ करण्यात आला आहे. शहरातील व्यापारी उलाढाल, उद्योग-व्यवसाय, शेती क्षेत्रातील आर्थिक व्यवहार आणि सर्वसामान्य नागरिकांच्या बँकिंगविषयक गरजा लक्षात घेता ही शाखा महत्त्वपूर्ण ठरणार आहे.
उद्घाटनप्रसंगी मार्गदर्शन करताना नानासाहेब जाधव यांनी करमाळावासीयांना आर्थिक प्रगतीसाठी बँकेच्या सेवांचा लाभ घेण्याचे आवाहन केले. ते म्हणाले की, सहकार क्षेत्रातील विश्वासार्हता आणि ग्राहकाभिमुख बँकिंग सेवा ही सोलापूर जनता सहकारी बँकेची खरी ताकद आहे. बँकेने आपल्या कार्यातून ग्राहकांचा विश्वास संपादन केला असून, विविध बँकिंग सुविधांच्या माध्यमातून आर्थिक व्यवहार अधिक सुलभ करण्याचा प्रयत्न केला आहे. करमाळा शहर आणि परिसरातील नागरिकांनी बँकेशी जोडले जाऊन आर्थिक प्रगतीचा नवा अध्याय सुरू करावा.
यावेळी बँकेचे जिल्हा संचालक डॉ. रमेशजी सिद्ध (पंढरपूर), अध्यक्ष सुनील पंडसे, उपाध्यक्ष डॉ. मिलिंद कुलकर्णी, मुख्य कार्यकारी अधिकारी विनय दुनाखे, शाखा व्यवस्थापक गणेश उमेदकळ आणि व्यवस्थापक देवदत्त पडवळकर यांच्यासह संचालक मंडळातील सदस्य उपस्थित होते. व्यवस्थापक देवदत्त पडवळकर यांनी प्रास्ताविकातून बँकेच्या आजवरच्या वाटचालीचा, शाखा विस्ताराचा आणि ग्राहकांना दिल्या जाणाऱ्या विविध सेवांचा आढावा घेतला.
बँकेचे अध्यक्ष सुनील पंडसे, उपाध्यक्ष डॉ. मिलिंद कुलकर्णी, जिल्हा संचालक डॉ. रमेशजी सिद्ध, मुख्य कार्यकारी अधिकारी विनय दुनाखे आणि नगराध्यक्षा मोहिनी सावंत यांनी मनोगत व्यक्त केले. करमाळा शहरातील नागरिकांना बँकिंग व्यवहारांसाठी चांगल्या सुविधा उपलब्ध होण्याबरोबरच सहकार क्षेत्राशी जोडले जाण्याची संधी मिळणार असल्याचे त्यांनी नमूद केले.
या उद्घाटन सोहळ्यात नवीन शाखेसाठी जागा उपलब्ध करून दिल्याबद्दल जागामालक खुशालभाई देवी आणि वास्तुविशारद राहुल खरे यांचा विशेष सन्मान करण्यात आला. तसेच शाखेतील प्रथम सोसायटी करंट खातेदार, प्रथम सेव्हिंग खातेदार, प्रथम करंट खातेदार, प्रथम ठेवीदार, प्रथम कर्जदार आणि प्रथम लॉकरधारक यांचाही बँकेच्या वतीने सत्कार करण्यात आला. ग्राहकांच्या सहभागातून बँकेच्या नव्या शाखेच्या कार्याची सुरुवात झाल्याने उपस्थितांमध्ये उत्साहाचे वातावरण होते.
या कार्यक्रमास बँकेचे संचालक सीए गिरीश बोरगांवकर, सौ. चंद्रिका चौहान, सीए आनंद करंदे, डॉ. महिनाथ शहाबादे, राजेश पवार, सौ. गौरी आमंडेकर, सुरेश चिकलगणी, अमित आपटे, पुरुषोत्तम उडता, डॉ. हर्षल डेंबळ, महादेव नवाबकर, चरणसिंग चव्हाण, रविंद्र साळे, प्रमोद भुतडा आणि विष्णू मोढे यांच्यासह विविध क्षेत्रांतील मान्यवर उपस्थित होते. कार्यक्रमाचे सूत्रसंचालन करमाळा शाखेचे व्यवस्थापक चंद्रशेखर जोगळेकर यांनी केले.
सोलापूर जनता सहकारी बँकेच्या ४२ व्या शाखेच्या प्रारंभामुळे करमाळा शहराच्या बँकिंग क्षेत्रात आणखी एका सक्षम पर्यायाची भर पडली आहे. सहकाराच्या माध्यमातून आर्थिक व्यवहारांना चालना देणे, ग्राहकांना आधुनिक सुविधा उपलब्ध करून देणे आणि स्थानिक आर्थिक विकासाला हातभार लावणे या दृष्टीने बँकेची ही नवीन शाखा महत्त्वपूर्ण ठरणार आहे.
कार्यक्रमाची सांगता प्राचार्य बाळासाहेब नरारे सर यांच्या पसायदानाने झाली.

saptahikpawanputra

Recent Posts

करमाळा तालुका प्राथमिक शिक्षक सहकारी पतसंस्थेच्या चेअरमनपदी तात्यासाहेब जाधव यांची बिनविरोध निवड व्हा. चेअरमनपदी निशांत खारगे, तर सचिवपदी अजित कणसे यांची निवड

  करमाळा  प्रतिनिधी करमाळा तालुका प्राथमिक शिक्षक सहकारी पतसंस्थेच्या चेअरमनपदी श्री. तात्यासाहेब जाधव यांची, तर…

7 hours ago

सोलापूर जिल्हा मध्यवर्ती सहकारी बँकेच्या निवडणुकीच्या पार्श्वभूमीवर करमाळा येथील श्री कमलाभवानी देवीच्या मंदिरात दर्शन घेऊन स्वाभिमानी शेतकरी सहकार पॅनलच्या प्रचाराचा शुभारंभ

करमाळा (प्रतिनिधी): सोलापूर जिल्हा मध्यवर्ती सहकारी बँकेच्या निवडणुकीच्या पार्श्वभूमीवर करमाळा येथील श्री कमलाभवानी देवीच्या मंदिरात…

17 hours ago

चार हजार ऊसदरासाठी शेतकऱ्यांचा महामार्गावर एल्गार राजाभाऊ कदम यांच्या नेतृत्वाखाली कुंभेज फाट्यावर रास्ता रोको; नऊ मागण्यांसाठी शासनाला इशारा

करमाळा  प्रतिनिधी उसाला प्रतिटन चार हजार रुपये दर मिळावा, यासह शेतकरी व सर्वसामान्य नागरिकांच्या नऊ…

1 day ago

सिव्हिल इंजिनिअर शैलेश खडके यांना मातृ शोक श्रीमती अंजली मधुकर खडके यांचे दुःखद निधन

करमाळा  प्रतिनिधी करमाळा येथील शिवाजीनगरमधील रहिवासी तथा सिव्हिल इंजिनिअर प्रसिद्ध क्राॅन्ट्रक्टर श्री. शैलेश मधुकर खडके…

2 days ago

ग्लोबल डिफेन्स अकॅडमीचा उद्घाटन सोहळा उत्साहात संपन्न!

  करमाळा प्रतिनिधी  ग्रामीण भागातील विद्यार्थ्यांना पोलीस, सैन्यदल, एनडीए व अग्निवीर यांसारख्या संरक्षण आणि शासकीय…

3 days ago