हैद्राबाद मुंबई या रेल्वेला केम येथे थांबा मिळावा तसेच इतर गाड्या सुरू करण्याची मागणी

करमाळा प्रतिनिधी   करमाळा तालुक्यातील केम रेल्वे स्टेशन येथे हैदराबाद-मुंबई या रेल्वेगाडीचा पूर्वीपासून चा थांबा कायम करावा. तसेच *विजापूर-मुंबई व पंढरपूर-मुंबई या रेल्वेगाडया लवकर सुरू करून त्यांना केम येथे थांबा मिळावा. अशी मागणी केम येथील विद्यार्थी, नोकरदार*, पासधारक व प्रवासी वर्गातून होत आहे.
करमाळा तालुक्यातील केम हे सर्वात मोठे गाव असून या गावची लोकसंख्या सुमारे बारा हजाराच्या आसपास आहे. तसेच हे गाव कुंकासाठी संपूर्ण देशात प्रसिद्ध आहे. कोरोणा काळाच्या अगोदर केम येथे हैदराबाद-मुंबई व चेन्नई-मुंबई मेल या रेल्वेगाड्या थांबत होत्या. त्यामुळे सोलापूर, बाशीं, कुर्डुवाडी, पंढरपूर, पुण्याला जाणऱ्या विद्यार्थी, पासधारक, नोकरदार व प्रवाशी यांना येण्या-जाण्याची सोयीचे होत होते. कोरोनामुळे या गाडया बंद झाल्या. कोरोनाचा प्रादुर्भाव कमी होत असल्यामुळे हळूहळू रेल्वेगाडया पूर्व पदावर येत आहेत. हैदराबाद-मुंबई ही गाडी सुरू आहे. परंतु, अजूनही या गाडीला केम रेल्वेस्थानकावर थांबा देण्यात आलेला नाही.
दिनांक ०१ डिसेंबर पासून चेन्नई-मुंबई ही गाडी सुपरफास्ट झाली असल्यामुळे त्या गाडीची वेळ बदलली असून ती केम येथे पहाटे ५:३० वा येणार आहे. त्यामुळे ही गाडी गैरसोयीची आहे. तसेच या गाडीचा रेल्वे विभागाने थांबा रद्द केला आहे. त्यामुळे सोलापूर बार्शी, कुर्डुवाडी, पंढरपूर ला जाणाऱ्या विद्यार्थी, नोकरदार, पासधारक प्रवाशी यांना गाडी नाही. त्यामुळे विद्यार्थ्यांचे शैक्षणिक नुकसान होत आहे. अगोदरच दिड वर्ष झाले कोरोनामुळे शाळा बंद आहेत. आता शाळा सुरू झाल्या आहेत तर विद्यार्थ्यांना जाण्या-येण्यासाठी गाडी नसल्याने विद्यार्थी घरीच आहेत. ज्या विद्यार्थ्यांची परिस्थिती बेताची आहे ते विद्यार्थी मोटार सायकलवरून ये-जा करतात. परंतु, काही विद्यार्थी येण्या-जाण्यासाठी काहीच साधन नसल्याने घरीच आहेत. दीडशे ते दोनशे विद्यार्थी रेल्वेने अप-डाऊन करतात. पुण्याला जाणाऱ्या प्रवाशांनाही आता कोणतीच गाडी नाही. खाजगी वाहनाने व्यापारी वर्ग, प्रवासी यांना प्रवास करावा लागत आहे.