व्यसनमुक्ती मेळाव्यातुन केंद्रातून दारू बंद झालेल्या रामवाडी गावातील दहा जणांचा सत्कार मान्यवरांच्या हस्ते संप्पन

केत्तूर ता.7 रामवाडी (ता. करमाळा) येथे जिल्हा परिषद प्रा शाळा या ठिकाणी व्यसनमुक्ती मेळावा पार पडला. या कार्यक्रमाच्या अध्यक्षस्थानी करमाळा तालुक्याचे पोलीस निरीक्षक ज्योतीराम गुंजवटे व प्रमुख पाहुणे म्हणून करमाळा तालुक्याचे गटविकास अधिकारी मनोज राऊत उपस्थित होते. या मेळाव्याचे आयोजन इंदापूर येथील शोभा फाउंडेशन व्यसनमुक्ती व पुनर्वसन केंद्राचे अध्यक्ष गौरव झांजुर्णे यांनी केले.

यावेळी व्यसनमुक्ती केंद्रातून दारू बंद झालेल्या रामवाडी गावातील दहा जणांचा सत्कार मान्यवरांच्या हस्ते पार पडला. या मेळाव्याला पुण्यातील ए ए सभासदांनी मार्गदर्शन केले आणि दारू मुक्ती साठी किंवा व्यसनमुक्तीसाठी ए ए संस्था कशा पद्धतीने काम करते यासंदर्भात मोलाचे मार्गदर्शन केले. यावेळी बोलताना शोभा फाउंडेशनचे अध्यक्ष गौरव झांजुर्णे यांनी व्यसन हा एक आजार आहे त्यावर योग्य उपचार घेतल्यास माणूस व्यसनापासून लांब राहू शकतो त्यामुळे या व्यसनापासून कशा पद्धतीने लांब राहता येईल त्यासाठी शोभा फाउंडेशन कशा पद्धतीने काम करते याची माहिती दिली. आणि कोणालाही जर व्यसनाचा त्रास असेल तर (8551951515) या क्रमांकावर संपर्क करण्याचे आवाहन केले. यावेळी प्रमुख पाहुण्यांनीही मोलाचे मार्गदर्शन केले. गटविकास अधिकारी राऊत यांनी व्यसन माणसाला आणि त्याच्या परिवाराला कशा पद्धतीने तळागाळाला घेऊन जाते याबद्दल मार्गदर्शन केले तर पोलीस निरीक्षक गुंजवटे यांनी पोलीस पथकसुद्धा कशा पद्धतीने समाजातून दारू बंदीसाठी काम करत आहे याबद्दल माहिती दिली. सदरील कार्यक्रमाला पंचक्रोशीतील बचत गटातील महिला व ग्रामस्थ उपस्थित होते या कार्यक्रमाचे नियोजन रामवाडी ग्रामस्थांनी केले व सूत्रसंचालन रामवाडी ग्रामपंचायतचे माजी सरपंच संतोष वारगड यांनी केले.