केत्तुरला पुणे-मुंबई एक्स्प्रेसचा थांबा द्या! उपसभापती ॲड. अजिनाथ विघ्ने यांची रेल्वे प्रशासनाकडे मागणी

करमाळा : प्रतिनिधी
केत्तुर रेल्वे स्थानकावर पुणे-मुंबईकडे जाणाऱ्या एक्स्प्रेस गाड्यांना थांबा मिळावा, अशी मागणी करमाळा पंचायत समितीचे उपसभापती ॲड. अजिनाथ विघ्ने यांनी केली आहे. यासंदर्भात नवीन प्रस्तावासह विभागीय रेल्वे व्यवस्थापकांकडे निवेदन सादर करण्यात आल्याची माहिती त्यांनी दिली.
केत्तुर रेल्वे स्थानकावरून पुणे-मुंबईकडे प्रवास करणाऱ्या नागरिकांची संख्या मोठी आहे. विशेषतः सकाळच्या सत्रात विद्यार्थी, नोकरदार, व्यावसायिक आणि सर्वसामान्य प्रवाशांची वर्दळ असते. मात्र, एक्स्प्रेस गाड्यांना थांबा नसल्याने प्रवाशांना गैरसोयीचा सामना करावा लागतो. गेल्या अनेक वर्षांपासून या स्थानकावर एक्स्प्रेस गाड्यांना थांबा देण्याची मागणी होत आहे.
सध्या सोलापूर आणि लातूरकडे जाणाऱ्या गाड्यांना थांबा मिळाल्याने प्रवाशांची गैरसोय काही प्रमाणात दूर झाली आहे. हरंगुळ व कलबुर्गी गाड्यांसह पॅसेंजर गाड्यांमधील प्रवाशांची संख्याही वाढत आहे. त्यामुळे सकाळच्या सत्रात पुणे-मुंबईकडे जाणाऱ्या प्रवाशांसाठी एक्स्प्रेसचा थांबा आवश्यक असल्याचे ॲड. विघ्ने यांनी नमूद केले.
मुंबई-हैदराबाद (२२७३२/२२७३१) किंवा चेन्नई-मुंबई (२२१५९/२२१६०) यांपैकी योग्य एक्स्प्रेसला केत्तुर येथे थांबा द्यावा, अशी मागणी निवेदनाद्वारे करण्यात आली आहे. या मागणीला मान्यता मिळाल्यास केत्तुरसह परिसरातील गावांमधील प्रवाशांचा वेळ आणि प्रवासाचा खर्च वाचण्यास मदत होणार आहे. त्यामुळे रेल्वे प्रशासनाने प्रवाशांची गरज लक्षात घेऊन सकारात्मक निर्णय घ्यावा, अशी अपेक्षा ॲड. अजिनाथ विघ्ने यांनी व्यक्त केली.