बैलपोळ्यानिमित्त गोसेवेचा जागर; ९० गोमातांच्या सान्निध्यात भक्तिमय सोहळा गुरु गणेश दिव्यरत्न गो-पालन संस्थेत पुरणपोळीचा नैवेद्य, विधिवत गोपूजन अन् गोसेवेचा संदेश

करमाळा प्रतिनिधी
बैलपोळा हा केवळ बैलांच्या पूजनाचा सण नसून, कृषीसंस्कृती, पशुप्रेम, कृतज्ञता आणि भारतीय परंपरेतील जीवमात्रांविषयीची संवेदना जपणारा सण आहे. याच भावनेतून दि. १० सप्टेंबर २०२६ रोजी गुरुवारी गुरु गणेश दिव्यरत्न गो-पालन संस्थेच्या गोशाळेत बैलपोळ्यानिमित्त भक्तिमय आणि सामाजिक बांधिलकीचा संदेश देणारा सोहळा उत्साहात पार पडला.
यावेळी गोशाळेतील गो-मातांना पुरणपोळीचा नैवेद्य अर्पण करण्यात आला. मान्यवरांच्या हस्ते विधिवत गो-मातेचे पूजन करून गोसेवेचे महत्त्व अधोरेखित करण्यात आले. परिसरात भक्तिभावाचे वातावरण निर्माण झाले होते.
यावेळी प्रकाशजी मुनोत यांनी गोशाळेच्या कार्याचे कौतुक करत गो-मातेचे भारतीय संस्कृतीतील स्थान स्पष्ट केले. गोसेवा ही केवळ धार्मिक भावना नसून ती समाजाची सामूहिक जबाबदारी आहे, असे त्यांनी सांगितले. पशुप्रेम, संवेदना आणि सेवाभाव या मूल्यांची जपणूक प्रत्येकाने केली पाहिजे, असे आवाहनही त्यांनी केले.
संस्थेचे अध्यक्ष श्रेणिकशेठ खाटेर यांनी उपस्थितांचे स्वागत करून गोशाळेच्या स्थापनेपासून आजपर्यंतच्या वाटचालीचा सविस्तर आढावा घेतला. गोशाळेच्या माध्यमातून गो-मातांची नियमित सेवा, संगोपन आणि संरक्षण करण्याचे कार्य सुरू असल्याचे त्यांनी सांगितले.
संस्थेचे सदस्य जगदीशजी शिगची यांनी गोशाळेच्या स्थापनेमागील इतिहास सांगितला. स्व. गोवर्धनजी शिगची सर, स्व. कांतिभाई संचेती, श्रेणिक खाटेर तसेच त्यांच्या सहकाऱ्यांमध्ये झालेल्या चर्चेतून गोशाळेची संकल्पना आकाराला आली आणि पुढे तिची प्रत्यक्ष उभारणी झाली, अशी माहिती त्यांनी दिली. गोशाळा सुरू झाल्यापासून पोपटराव कालदाते व त्यांचे कुटुंबीय गो-मातेच्या सेवेत सातत्याने योगदान देत असल्याचेही त्यांनी नमूद केले.
आज या गोशाळेत सुमारे ९० गो-मातांची नियमित सेवा व संगोपन केले जात आहे. त्यामुळे बैलपोळ्यानिमित्त झालेल्या या कार्यक्रमाला विशेष महत्त्व प्राप्त झाले. गो-मातेच्या सेवेतून संस्कार, माणुसकी आणि सामाजिक बांधिलकीची जपणूक होत असल्याची भावना उपस्थितांनी व्यक्त केली.
यावेळी ह.भ.प. अमोल महाराज कालदाते यांनी आपल्या ओघवत्या आणि प्रभावी वाणीतून उपस्थितांना मंत्रमुग्ध केले. गोसेवा, भारतीय संस्कृती, संस्कार, सेवाभाव आणि आध्यात्मिक समाधान यांचा परस्परसंबंध त्यांनी आपल्या विचारांतून स्पष्ट केला. गो-मातेची सेवा ही समाजाला संवेदनशील बनविणारी शक्ती असून, पुढील पिढीमध्येही सेवाभावाचे संस्कार रुजविण्याची गरज असल्याचे त्यांनी सांगितले.
दरम्यान पत्रकार रितेशजी कटारिया आणि श्री. तनिश कटारिया यांच्या वाढदिवसानिमित्त संस्थेच्या वतीने त्यांचा सन्मान करण्यात आला. संस्थेचे अध्यक्ष श्रेणिकशेठ खाटेर तसेच संस्थेच्या सदस्यांच्या उपस्थितीत हा सत्कार करण्यात आला. गो-मातेच्या सान्निध्यात वाढदिवसाचा आनंद साजरा करण्याचा हा उपक्रम उपस्थितांसाठी विशेष ठरला.
या कार्यक्रमास अनिल सोळंकी, संतोषशेठ गुगळे, विजय मंडलेचा, प्रकाश मुनोत, राहुल संचेती, संतोष कटारिया, केतन संचेती, रितेश कटारिया, कचरू काका मंडलेचा, अजिंक्य गुगळे, आदेश ललवाणी, दिनेश मुथा, प्रदीप लुनिया, अक्षय मंडलेचा, अभय शिंगवी, गणेश बोरा, संजय लुनिया, नितीन दोशी, प्रीतम दोशी, वैभव दोशी, आशिष बोरा, सागर पटवा, तनिश कटारिया, शैलेश देशमाने, संगीता खाटेर, मोक्षा खाटेर, ज्योती मंडलेचा, ज्योती मुथा, छाया हिरण, चंद्रकांत कालदाते, अमोल कालदाते, विजय बरीदे, गिरीश शहा, अक्षय शिंदे, नागेश पवार यांच्यासह अनेक मान्यवर, गोप्रेमी आणि नागरिक उपस्थित होते.
बैलपोळ्यानिमित्त आयोजित या सोहळ्याने परंपरा आणि सामाजिक बांधिलकीचा सुंदर संगम घडवून आणला. गो-मातेची सेवा, पशुप्रेम, भारतीय संस्कृतीचे जतन आणि समाजामध्ये सेवाभावाची भावना रुजविण्याचा संदेश या कार्यक्रमातून देण्यात आला. गोशाळेच्या कार्याला समाजातील नागरिकांनी पुढाकार घेऊन सहकार्य करावे, अशी अपेक्षाही यावेळी व्यक्त करण्यात आली.