प्रधानमंत्री आवास व स्वनिधी योजनांसाठी ३० जानेवारी रोजी करमाळ्यात विशेष नोंदणी मेळावा-सचिन तपसे

करमाळा प्रतिनिधी
करमाळा नगर परिषद अंतर्गत केंद्र शासन पुरस्कृत प्रधानमंत्री आवास योजना (शहरी) तसेच प्रधानमंत्री पथविक्रेता आत्मनिर्भर निधी (स्वनिधी योजना) अंतर्गत पात्र व इच्छुक लाभार्थ्यांची नोंदणी करण्यासाठी विशेष नोंदणी मेळाव्याचे आयोजन करण्यात आले आहे अशी माहिती करमाळा नगरपरिषदेचे मुख्याधिकारी सचिन तपसे यांनी दिली आहे. या मेळाव्यात शासनाच्या इतर विविध लोककल्याणकारी योजनांचीही माहिती नागरिकांना देण्यात येणार आहे.
हा मेळावा शुक्रवार, दिनांक ३० जानेवारी २०२६ रोजी सकाळी ११ वाजता करमाळा येथील ज्ञानेश्वर वाचन मंदिर, किल्ला विभाग येथे होणार आहे. शहरातील आर्थिकदृष्ट्या दुर्बल घटक, अल्प उत्पन्न गटातील कुटुंबे तसेच पथविक्रेत्यांसाठी हा मेळावा लाभदायक ठरणार आहे.
प्रधानमंत्री आवास योजना (शहरी) अंतर्गत स्वतःचे हक्काचे घर नसलेल्या पात्र लाभार्थ्यांना घरकुलासाठी शासनाकडून आर्थिक सहाय्य दिले जाते. तर प्रधानमंत्री स्वनिधी योजनेंतर्गत रस्त्यावर व्यवसाय करणाऱ्या पथविक्रेत्यांना व्यवसाय वृद्धीसाठी सुलभ व कमी व्याजदरात कर्जसुविधा उपलब्ध करून दिली जाते. या योजनांचा लाभ घेण्यासाठी आवश्यक कागदपत्रे, पात्रतेचे निकष व अर्ज प्रक्रियेबाबत सविस्तर मार्गदर्शन या मेळाव्यात करण्यात येणार आहे.
मेळाव्याच्या ठिकाणी नगर परिषद अधिकारी व कर्मचारी उपस्थित राहून लाभार्थ्यांची नोंदणी करून घेणार असून त्यांच्या अडचणी व शंकांचे निरसनही करण्यात येणार आहे. त्यामुळे पात्र व इच्छुक लाभार्थ्यांनी आवश्यक कागदपत्रांसह उपस्थित राहावे, असे आवाहन करमाळा नगरपरिषदेचे मुख्याधिकारी सचिन तपसे करमाळा नगर परिषदेतर्फे करण्यात आले आहे.