ग्लोबल सायन्स इन्स्टिट्यूटचे संस्थापक प्रा.डॉ महेश निकत यांची मेस्टा सोलापूर जिल्हा उपाध्यक्षपदी निवड
करमाळा प्रतिनिधी : महाराष्ट्र इंग्लिश स्कूल ट्रस्टीज असोसिएशन (MESTA) यांच्या वतीने शैक्षणिक क्षेत्रात उल्लेखनीय कार्य करणारे ग्लोबल सायन्स इन्स्टिट्यूट, करमाळाचे संस्थापक अध्यक्ष प्रा. डॉ.महेश निकत सर यांची सोलापूर जिल्हा उपाध्यक्षपदी निवड करण्यात आली आहे. शैक्षणिक वर्ष २०२६-२७ साठी ही निवड करण्यात आली असून, त्यांच्या निवडीचे सर्व स्तरातून स्वागत होत आहे.
महाराष्ट्र इंग्लिश स्कूल ट्रस्टीज असोसिएशन (MESTA) ही इंग्रजी माध्यमाच्या शाळा व संस्थाचालकांच्या प्रश्नांसाठी तसेच शैक्षणिक क्षेत्राच्या विकासासाठी कार्यरत असलेली संघटना आहे. करमाळा तालुक्यातील शिक्षण क्षेत्रात प्रा.डॉ महेश निकत यांनी केलेल्या कार्याची दखल घेत त्यांच्यावर ही महत्त्वाची जबाबदारी सोपविण्यात आली आहे.
ग्लोबल सायन्स इन्स्टिट्यूट, करमाळाच्या माध्यमातून ग्रामीण भागातील विद्यार्थ्यांना गुणवत्तापूर्ण 5 वी तें 10 वी शिक्षण, स्पर्धा परीक्षांचे मार्गदर्शन तसेच NEET, JEE, MHT-CET यांसारख्या परीक्षांसाठी सक्षम मार्गदर्शन उपलब्ध करून देण्यासाठी प्रा. निकत सर सातत्याने कार्यरत आहेत. विद्यार्थ्यांच्या शैक्षणिक प्रगतीसोबतच त्यांच्यातील विविध गुणांना वाव देण्यासाठीही संस्थेच्या माध्यमातून विविध उपक्रम राबविले जातात.
सोलापूर जिल्हा उपाध्यक्ष म्हणून निवड झाल्यामुळे जिल्ह्यातील शैक्षणिक संस्था, संस्थाचालक, शिक्षक आणि विद्यार्थ्यांच्या विविध प्रश्नांसाठी काम करण्याची मोठी जबाबदारी प्रा. महेश निकत यांच्या खांद्यावर आली आहे. त्यांच्या अनुभवाचा आणि शैक्षणिक क्षेत्रातील कार्याचा संघटनेला निश्चितच उपयोग होईल, अशी अपेक्षा व्यक्त होत आहे.
त्यांच्या या निवडीबद्दल मेस्टाचे सोलापूर जिल्हा सचिव सुहास आभा साळुंखे, संपर्क प्रमुख प्रा. देविदास गोडसे-पाटील, सोलापूर मेस्टा अध्यक्ष प्रा. संदिपान गुटाळ तसेच ग्लोबल सायन्स इन्स्टिट्यूटचे शिक्षक, विद्यार्थी, पालक व शिक्षण क्षेत्रातील मान्यवरांनी अभिनंदन करून पुढील कार्यासाठी शुभेच्छा दिल्या.
“शिक्षण क्षेत्राच्या विकासासाठी आणि विद्यार्थ्यांच्या उज्ज्वल भविष्यासाठी अधिक जोमाने कार्य करण्याची संधी मिळाली असून, सोपविलेली जबाबदारी प्रामाणिकपणे पार पाडू,” अशी भावना प्रा. महेश निकत यांनी व्यक्त केली आहे.
