करमाळ्यातील छत्रपती शिवाजी महाराज अश्वारूढ पुतळा परिसर सुशोभीकरणासाठी ५० लाखांचा निधी मंजूर करा शिवस्मारक प्रतिष्ठानची मागणी

करमाळा प्रतिनिधी
शिवस्मारक प्रतिष्ठाण यांच्या वतीने करमाळा नगर परिषद हद्दीतील छत्रपती शिवाजी महाराज यांच्या अश्वारूढ पुतळा परिसराच्या सुशोभीकरणासाठी तसेच नव्या चबुतऱ्याच्या बांधकामासाठी ५० लाख रुपयांचा निधी मंजूर करण्याची मागणी करण्यात आली आहे. यासंदर्भात ग्रामविकास मंत्री तथा सोलापूर जिल्ह्याचे पालकमंत्री जयकुमार गोरे यांना निवेदन देण्यात आले.
निवेदनात नमूद करण्यात आले आहे की, करमाळा शहरातील शिवाजी महाराजांचा अश्वारूढ पुतळा हा शहराच्या वैभवाचे प्रतीक असून त्या परिसराचे सुशोभीकरण करणे गरजेचे आहे. सध्याच्या स्थितीत परिसरात सुयोग्य रचना, आकर्षक प्रकाशयोजना, हरितीकरण आणि भक्कम चबुतरा उभारण्याची आवश्यकता आहे. यासाठी ५० लाख रुपयांचा विशेष निधी मंजूर करावा, अशी मागणी करण्यात आली आहे.
यावेळी उपनगराध्यक्ष अतुल फंड, भाजप जिल्हा सरचिटणीस गणेश भाऊ चिवटे, भाजप तालुकाध्यक्ष काकासाहेब सरडे, सचिन गायकवाड, रामभाऊ ढाणे, विनय ननवरे, अरुण जगताप, प्रविण जाधव, गणेश महाडिक आदी मान्यवर उपस्थित होते.
या प्रसंगी बोलताना मंत्री जयकुमार गोरे यांनी, “भाजप नगरसेवकांना विकासकामांसाठी निधी कमी पडू दिला जाणार नाही. आवश्यक त्या कामांसाठी शासनाकडून योग्य ती मदत केली जाईल,” असे अभिवचन दिले. तसेच आठवड्याभरातच ५० लाखांचा निधी देण्यात येईल, अशी ग्वाहीही त्यांनी दिली.
दरम्यान, करमाळा शहरातील नागरिकांमध्ये या मागणीबाबत सकारात्मक वातावरण असून, लवकरच निधी येणार असून कामास सुरुवात होईल, अशी अपेक्षा व्यक्त केली जात आहे.