दत्तकला शिक्षण संस्थेमध्ये २६-२७ फेब्रुवारीला आंतरराष्ट्रीय परिषद फार्मास्युटिकल, लाईफ व फॉरेन्सिक सायन्सेसमधील नवकल्पनांवर मंथन
करमाळा प्रतिनिधी: दत्तकला शिक्षण संस्थेच्या नेतृत्वाखाली कार्यरत असलेल्या दत्तकला इन्स्टिट्यूट ऑफ फार्मास्युटिकल सायन्स अँड रिसर्च व संलग्न दत्तकला कॉलेज ऑफ फार्मसी, भिगवण यांच्या वतीने २६ व २७ फेब्रुवारी २०२६ रोजी आंतरराष्ट्रीय परिषदेचे आयोजन करण्यात आले आहे. ही परिषद महाविद्यालयाच्या परिसरात पार पडणार असून देश-विदेशातील तज्ज्ञ, संशोधक, उद्योग क्षेत्रातील व्यावसायिक तसेच विद्यार्थी मोठ्या संख्येने सहभागी होणार आहेत.
“फार्मास्युटिकल, लाईफ अँड फॉरेन्सिक सायन्सेसमधील नवकल्पना : शास्त्रीय ज्ञानाचा आधुनिक तंत्रज्ञानाशी संगम” हा परिषदेचा मुख्य विषय असून औषधनिर्मिती क्षेत्रातील अत्याधुनिक संशोधन, नवतंत्रज्ञानाचा वापर, तसेच फॉरेन्सिक सायन्समधील बदलते प्रवाह यावर सखोल चर्चा होणार आहे. संशोधनपर शोधनिबंध सादरीकरण, तज्ज्ञांची मार्गदर्शक व्याख्याने, तसेच उद्योग-शिक्षण क्षेत्रातील समन्वय यावर विशेष सत्रांचे आयोजन करण्यात आले आहे.
संस्थेच्या सचिव श्रीमती माया झोळ यांनी सांगितले की, या परिषदेच्या माध्यमातून विद्यार्थ्यांना आंतरराष्ट्रीय दर्जाचे मार्गदर्शन मिळावे आणि संशोधनाची नवी दारे खुली व्हावीत, हा प्रमुख उद्देश आहे. संस्थापक-अध्यक्ष प्रा. रामदास झोळ यांनीही परिषदेमुळे ग्रामीण भागातील विद्यार्थ्यांना जागतिक पातळीवरील संशोधन व नवकल्पनांची ओळख होईल, असा विश्वास व्यक्त केला.
परिषदेच्या उद्घाटनासाठी मान्यवर प्रमुख पाहुण्यांना निमंत्रित करण्यात आले असून त्यांच्या मार्गदर्शनामुळे तरुण संशोधकांना प्रेरणा मिळणार आहे. दोन दिवस चालणाऱ्या या परिषदेत विविध तांत्रिक सत्रे, पोस्टर प्रेझेंटेशन व चर्चासत्रांचा समावेश असणार आहे.
भिगवण परिसरातील शैक्षणिक क्षेत्रासाठी ही परिषद एक महत्त्वपूर्ण घटना ठरणार असून औषधनिर्मिती व संबंधित विज्ञान शाखांमध्ये कार्यरत असलेल्या संशोधकांसाठी हा एक उत्तम व्यासपीठ ठरणार आहे.
