धर्मवीर छत्रपती संभाजी महाराजांची जयंती करमाळ्यात उत्साहात साजरी
करमाळा प्रतिनिधी करमाळा शहर व तालुका उत्सव समितीच्या माध्यमातून स्वराज्याचे धाकले धनी, धर्मवीर छत्रपती संभाजी महाराज यांची जयंती बुधवारी (ता. १४) मोठ्या उत्साहात आणि भक्तिमय वातावरणात साजरी करण्यात आली. दिवसभर विविध धार्मिक, सांस्कृतिक आणि पारंपरिक कार्यक्रमांचे आयोजन करण्यात आले होते.
जयंतीनिमित्त सकाळी छत्रपती संभाजी महाराजांच्या पुतळ्याचे पूजन करून पारंपरिक विधी पार पडले. यावेळी शिवभक्तांनी घोषणांनी परिसर दणाणून सोडला. दिवसभर लहानांपासून ज्येष्ठांपर्यंत अनेक नागरिकांनी पुतळ्याला पुष्पहार अर्पण करून दर्शन घेतले.
संध्याकाळी शहरातून पारंपरिक सवाद्य मिरवणूक काढण्यात आली. ढोल-ताशांच्या गजरात आणि जयघोषात निघालेल्या या मिरवणुकीत घोडे, छत्रपती संभाजी महाराजांची प्रतिकात्मक मूर्ती तसेच विविध ऐतिहासिक वेशभूषेतील मावळे सहभागी झाले होते. मिरवणुकीने शहरातील प्रमुख मार्गांवरून फेरफटका मारत नागरिकांचे लक्ष वेधून घेतले.
यावेळी शिवप्रेमींमध्ये उत्साहाचे वातावरण पाहायला मिळाले. एकमेकांना पेढे भरवून आनंदोत्सव साजरा करण्यात आला. शहरातील विविध सामाजिक संस्था, युवक मंडळे आणि नागरिकांनी कार्यक्रमात उत्स्फूर्त सहभाग नोंदविला.
धर्मवीर छत्रपती संभाजी महाराजांनी स्वराज्याचा विस्तार करत स्वाभिमान आणि धर्मरक्षणासाठी दिलेले बलिदान प्रेरणादायी असल्याची भावना उपस्थितांनी व्यक्त केली आहे.
