नामसाधना मॉडर्न स्कूलची आषाढी दिंडी भक्तिरसात रंगली ‘ज्ञानोबा-तुकाराम’च्या जयघोषाने करमाळा दुमदुमली; युवा नेते शंभूराजे जगताप यांचा संस्कारांचा संदेश

करमाळा प्रतिनिधी आषाढी एकादशीच्या पावन पर्वानिमित्त नामसाधना मॉडर्न स्कूल, करमाळा येथे गुरुवार (दि. २३ जुलै) रोजी पारंपरिक आषाढी दिंडी सोहळा अत्यंत भक्तिमय आणि उत्साहपूर्ण वातावरणात पार पडला. टाळ-मृदुंगाचा गजर, विठ्ठल नामाचा अखंड जयघोष आणि वारकरी वेशभूषेतील बाल-वारकऱ्यांच्या सहभागामुळे शाळा परिसरासह करमाळा शहर भक्तिरसात न्हाऊन निघाले.
या दिंडी सोहळ्यास कृषी उत्पन्न बाजार समितीचे संचालक, खरेदी-विक्री संघाचे अध्यक्ष तसेच नामसाधना मॉडर्न स्कूलचे संस्थापक-विश्वस्त मा. श्री. शंभूराजे जयवंतराव जगताप यांची प्रमुख उपस्थिती लाभली. त्यांच्या हस्ते दिंडीचे स्वागत करण्यात आले.
यावेळी विद्यार्थ्यांना मार्गदर्शन करताना श्री. जगताप म्हणाले, “महाराष्ट्राला लाभलेली संत परंपरा आणि वारकरी संप्रदाय हा आपल्या संस्कृतीचा आधारस्तंभ आहे. आधुनिक विज्ञानयुगात गुणवत्तापूर्ण शिक्षणाबरोबरच मुलांमध्ये संस्कार, नैतिक मूल्ये आणि सामाजिक जाणीव रुजविणे ही काळाची गरज आहे. संतांच्या विचारांचा वारसा जपणारी पिढीच आदर्श समाज घडवू शकते.” त्यांनी उपस्थित विद्यार्थी, शिक्षक, पालक तसेच नागरिकांना आषाढी एकादशीच्या शुभेच्छा दिल्या.
दिंडीमध्ये सहभागी झालेल्या विद्यार्थ्यांनी वारकरी परंपरेचे जिवंत दर्शन घडविले. डोक्यावर तुळशीवृंदावन घेतलेल्या विद्यार्थिनी, पारंपरिक वारकरी वेशभूषेतील लहानगे, हातात टाळ-मृदुंग घेऊन विठ्ठलनामाचा गजर करणारे विद्यार्थी आणि ‘ज्ञानोबा-तुकाराम’च्या जयघोषाने परिसर दुमदुमविणारे बाल-वारकरी हे या सोहळ्याचे प्रमुख आकर्षण ठरले. दिंडी मार्गावर नागरिक आणि पालकांनी उत्स्फूर्तपणे स्वागत करून विद्यार्थ्यांचे कौतुक केले.
या उपक्रमाचे नियोजन शाळेच्या मुख्याध्यापिका सौ. कोरडे मॅडम यांच्या मार्गदर्शनाखाली करण्यात आले. सर्व शिक्षक, शिक्षकेतर कर्मचारी आणि पालकांच्या सहकार्यामुळे संपूर्ण कार्यक्रम शिस्तबद्ध आणि उत्साहपूर्ण वातावरणात पार पडला.
भारतीय संस्कृती, वारकरी परंपरा आणि संत साहित्याची ओळख विद्यार्थ्यांना करून देत त्यांच्यामध्ये सामाजिक, नैतिक आणि आध्यात्मिक मूल्यांची जोपासना करणारा हा उपक्रम करमाळा शहरात विशेष कौतुकाचा विषय ठरला. आषाढी एकादशीच्या निमित्ताने आयोजित करण्यात आलेल्या या दिंडी सोहळ्याने विद्यार्थ्यांमध्ये भक्ती, संस्कार आणि सामाजिक ऐक्याचा संदेश प्रभावीपणे रुजविल्याची भावना उपस्थितांनी व्यक्त केली आहे.